Mat 28 | MHL | STEP | Aria Sabat fofa weesereya Sande epa wiiwim Makdala owow emeria Maria, ne Maria oko naap Yeesus mokoka karuowa iwamik.

Matthew 28

Yeesus umep ikok iikirak

(Mak 16.10, Luk 24.1-10, Yon 20.1-18)

1 Aria Sabat fofa weesereya Sande epa wiiwim Makdala owow emeria Maria, ne Maria oko naap Yeesus mokoka karuowa iwamik. 2 Wi ikiwep mamaiya arem-ikaiwkin maa ofofona maneka-ke imenarek. Ne Mua Maneka ensel owow iinan-pa oromi nomon ona ofomap-puamik nain opap kirip-pekap-puap nomona nain iinan-pa pokap ikua. 3 Ona miira aapereka wilinowa saarik wilinem-ikua, ne mia suuwowa nain aakafua saarik kia akena. 4 Ne wi ami mua nan ikemik nain naap urufap soranep karanemi kema puep iwami miiwa-pa wakiemi puep ikemik. 5 Aria ensel-ke wi emeria nain ekapep fuuniwkin wia maakek, “Ni mia me fufueka, ni Yeesus nomokow moke-pa umok nain urufowa ekapeman. 6 O fan me ikua, iiriw iikirak, iiriw nia maakem-ikua naap. Ni epap o wuamik fain urufeka. 7 Urufap-puap kirep ikiwep ona teeria feenap wia maakeka, ‘Yeesus iiriw iikirak. Ne kiikir Galili ikiwinon. Ni neeke ikiwep urufowen!’ Naap wia maakeka. Yo fan nia maakem, ni ikiweka.”

8 Aria wi kirep ona teeria wia maaku naep ipetar-ikiwemik. Makena wi keker opamik, nain opora nain miimap manek akena kemelamik. 9 Wi naap ipetarem-ikaiwkin Yeesus ona wiar imenarep wia ane-puukak. Wi naap urufap wameiya wiar ekap meren onoma-pa wiam wafurami lotu onamik. 10 Ne wia maakek, “Ni me keker opaka, ikiwemi yena teeria wia maakiwkin wi Galili ikiwep neeke efa urufuk.”

Wi ami mua-ke wadol opora onamik

11 Aria emeria wiam erup nain ikiwem-ikemik-na wi ami mua papako nan ikemik nain, wis pun maa naap urufap baurarep wi pris woos mua ikip wia maakemik. 12 Ne aria wi pris woos mua wi owow woos mua onaiya wiam aawep aakunep sira feenap onamik. Wi ami mua maamuma maneka wiemi 13 wia maakemik, “Ni ikiwemi opora fain manekeka. ‘Uura i inep ikemkun ona teeria-ke sawi napuma nain ekapep ikum aawemik,’ naap maeka. 14 Ne opora nain-ke ikiwep anim onoma maneka ifana wiar oreya-na ni opora marew, ikoka yiena kakeniyen.” Naap wia maakemik. 15 Aria wi mua maamuma nain aawep opora nain manekamik. Naapeya wi Yuuda unowa opora nain-ke ikip manekarek. Ne aakisa opora nain pun naap maem-ikaimik.

Yeesus ona teeria uuwowa wiek

(Mak 16.14-18, Luk 24.36-49, Yon 20.19-23)

16 Aria Yeesus teeria ten kuisow nainiw kuisow nain Galili ikiwep fuunep ema oko urupemik, iiriw ona wia maakek naap. 17 Wi urupep o urufap keema muuna mikap o lotu onamik. Nain wi papako-ke urufap kema unu-unowa wuamik. 18 Naeya Yeesus-ke wiokap epami wia maakek, “Aakisa Auwa-ke kekanowa unum maneka onaiya yieya yos-keriw owow iinan ne miiwa iiwawun urufami wia nomakep ikem. 19 Naapeya ni miiw unowa, owow unowa ikiwep wia maakiwkin opora efar opap yena teeria efar aruk. Ne wia yasuwami Auwa, Muuka ne Ewar Eliwa unuma-pa wia yasuweka. 20 Ne yo opora nia maakem-ikem nain iiwawun suule wiem-ikaiwkin yo opora efar ookam-ikauk. Yena anane niamiya ikainen, ikiwep iiwawun miiwa weeserow epa-pa.”